गरिखाने शिक्षा अबको आवश्यकता

नेपाल सम्भावनै सम्भावनाले भरिएको देश हो । हाम्रो देशमा जल, जमिन र जडीबुटी प्रकृतिका अमूल्य वरदानका रूपमा रहेका छन् । यी स्रोतको सही सदुपयोग गर्न सक्ने हो भने नेपाललाई समृद्ध र आत्मनिर्भर बनाउन सकिन्छ । तर प्राकृतिक स्रोत र सम्भावना भएर मात्र देश समृद्ध हुँदैन । त्यसका लागि श्रम गर्नुपर्छ, उत्पादन गर्नुपर्छ र उत्पादनसँग जोडिएको शिक्षा आवश्यक हुन्छ । त्यसैले आजको नेपालको सबैभन्दा ठूलो आवश्यकता हो– गरिखाने शिक्षा ।

हामीले वर्षौंदेखि शिक्षालाई किताब, परीक्षा र प्रमाणपत्रसँग मात्र जोडेर हेर्दै आएका छौँ । विद्यार्थीले धेरै कुरा पढ्छ, परीक्षा दिन्छ र प्रमाणपत्र प्राप्त गर्छ । तर उसले आफ्नो जीवनमा आवश्यक पर्ने सीप, श्रम, उद्यम र उत्पादनको ज्ञान कति पायो ? यही प्रश्न आज गम्भीररूपमा उठाउनुपर्ने बेला आएको छ ।