देउवा नेपाल फर्कन समय लाग्ने, फर्केपछि बस्न घर खोजी हुँदै

काठमाडौँ । नेपाली कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा र उनकी पत्नी डा. आरजु राणा देउवा नेपाल फर्कन अझै केही समय लाग्ने भएको छ । निकटस्थ स्रोतका अनुसार देउवा दम्पती जुन ५ तारेखमा नेपाल फर्कने तयारीमा थिए, तर डाक्टरले दिएको सुझावका कारण केही समय हङकङमै बस्ने निधो गरेको पारिवारिक स्रोतले जनाएको छ ।

फागुन १३ गते देउवा नेपालबाट सिङ्गापुर गएका थिए । पत्नी डा. आरजु भने त्योभन्दा केही समय अगाडि नेपालबाट भारत गएकी थिइन् । भारतबाटै सिङ्गापुर पुगेर दम्पती चैत ७ गते हङकङ प्रस्थान गरेका थिए । त्यो भन्दा अगाडि देउवा दम्पती कात्तिक १० गते सिङ्गापुर गएर १८ दिनमा नेपाल फर्किएका थिए ।