नयाँ कप्तान, नयाँ आशा : एसिया कपको ढोका खोल्ने लक्ष्य

नयाँ कप्तान सन्दीप लामिछानेको नेतृत्वमा च्याम्पियन बन्ने लक्ष्यसहित नेपाली क्रिकेट टोली एसिसी प्रिमियर कपका लागि होमिँदै छ। आगामी अगस्ट ३० तारिखदेखि सेप्टेम्बर १२ तारिखसम्म मलेसियामा हुने एसिसी प्रिमियर कपका नेपालसहित १० राष्ट्रले एसिया कप खेल्ने लक्ष्यसहित चुनौती प्रस्तुत गर्दै छन्। यो प्रतियोगिता विश्वकै बलिया राष्ट्रले खेल्ने एसिया कपको ढोकासँगै आइसिसी विश्वकप लिग–२ मा नेपालको अन्तिम चार खेलका लागि तयार हुने माध्यम पनि बन्ने आशा छ।

लिग–२ को अन्तिम शृंखलाले नेपालको एक दिवसीय मान्यता पनि जोगाउन सक्छ। त्यसअघि एक दिवसीय फरम्याटको एसिसी प्रिमियर कप राम्रो माध्यम बन्न सक्छ। प्रिमियर कपको विजेताले आगामी एसिया कपमा खेल्ने पाउने प्रावधान छ। एसियाभित्रका आइसिसीको पाँच वटा पूर्ण सदस्य र प्रिमियर कप विजेतासहित ६ राष्ट्रले बंगलादेशमा सन् २०२७ मा हुने एसिया कप खेल्ने छन्।