प्रतिबन्धित पान मसालाको प्रचार गरेको भन्दै शाहरुख, अजय र टाइगरसँग स्पष्टीकरण माग

महाराष्ट्र खाद्य तथा औषधि प्रशासन (एफडीए) ले बलिउड अभिनेता शाहरुख खान, अजय देवगन र टाइगर श्रॉफलाई कारण देखाऊ सूचना पठाएको छ। ‘विमल इलायची’को विज्ञापनमार्फत महाराष्ट्रमा प्रतिबन्धित ‘विमल पान मसाला’को अप्रत्यक्ष प्रचार गरेको आरोप एफडीएले लगाएको छ।

एफडीएले ११ अगस्टमा तीनै अभिनेतालाई सूचना पठाउँदै विज्ञापनमा उनीहरूको भूमिकाबारे १५ दिनभित्र स्पष्टीकरण दिन निर्देशन दिएको छ। भारतीय सञ्चारमाध्यमका अनुसार शाहरुखलाई उनको मुम्बईस्थित निवासमा, अजयलाई जुहूस्थित आवासमा र टाइगरलाई उनको उत्पादन कम्पनीको ठेगानामा सूचना पठाइएको छ।