सचिव कृष्णहरि पुष्करमाथि सम्पत्ति शुद्धीकरणमा अनुसन्धान सुरु

काठमाडौं । प्रधानमन्त्री तथा मन्त्रिपरिषद्को कार्यालय स्थित जगेडामा कार्यरत सचिव कृष्णहरी पुष्करको सम्पत्ति छानबिन थालिएको छ । सम्पत्ति शुद्धीकरण अनुसन्धान विभागले उनको सम्पत्तिबारे छानबिन थालेको विभागका एक अधिकृतले रातोपाटीलाई बताए ।

प्रधानमन्त्री बालेन्द्र शाहलाई म्यासेज पठाएको घटनामा जेठ २१ मा प्रहरीले उनलाई नियन्त्रणमा लिएर सोधपुछ गरेको थियो । त्यसपछि उनलाई उपराष्ट्रपतिको कार्यालयबाट हटाएर जगेडामा राख्ने निर्णय गरिएको थियो । उनले प्रधानमन्त्री बालेन्द्र शाहको हटलाईन नम्बरमा म्यासेज गरेर राजदूत पदको फारम भरेको जानकारी दिँदै सहयोग गर्न आग्रह गरेका थिए । महोत्तरीको जलेश्वर–४ सुगा घर भएका पुष्कर र प्रधानमन्त्री शाह एउटै जिल्लाका हुन् ।