राष्ट्रिय सभामा ग्यास अभाव, बाढी–पहिरोको क्षति र समसामयिक विषयमा सरकारको ध्यानाकर्षण

काठमाडौँ। राष्ट्रिय सभाको बैठकमा सांसदहरूले मुलुकमा व्याप्त खाना पकाउने ग्यास (एलपीजी) को अभाव, बाढी–पहिरोबाट भएको जनधनको क्षति तथा विभिन्न समसामयिक राजनीतिक र सामाजिक विषयमा सरकारको गम्भीर ध्यानाकर्षण गराएका छन्। बैठकको ‘शून्य समय’ मा बोल्दै उनीहरूले नागरिकले भोगिरहेका सास्तीप्रति सरकारको ध्यानाकर्षण गराएका हुन्।

बैठकमा सांसद गीता देवकोटाले बजारमा ग्यासको नियमित आयात भनिए पनि सर्वसाधारणले घण्टौँ लाइन बस्दा समेत ग्यास पाउन नसकेको गुनासो गरिन्। मन्त्री र सरकारका भान्सामा अभाव नहुने तर आम जनताको चुलो नबल्ने अवस्थाको अन्त्य गर्न माग गर्दै उनले पारदर्शी वितरण प्रणाली लागू गर्न र कालोबजारी नियन्त्रण गर्न सरकारलाई रुलिङ गर्न माग गरिन्।