शेरबहादुर दाइ रेफ्री हुनुपर्थ्यो, कसैको जर्सी लगाएर मैदानमा आउनुभयो :  प्रदीप पौडेल

काठमाडौँ । नेपाली कांग्रेसका महामन्त्री प्रदीप पौडेलले पार्टी सभापति शेरबहादुर देउवाको भूमिका र हालै सम्पन्न इतर समूहको राष्ट्रिय भेला प्रति टिप्पणी गरेका छन् । सोमबार जारी केन्द्रीय समिति बैठकमा आफ्नो धारणा राख्दै महामन्त्री पौडेलले सभापति देउवा रेफ्री हुनुपर्नेमा एउटा समूहको जर्सी लगाएर आएको भन्दै असन्तुष्टि पोखेका हुन् ।

महामन्त्री पौडेलले सभापति देउवाबाट निष्पक्ष अभिभावकत्वको अपेक्षा गरिएको भए पनि त्यसो हुन नसकेको बताए । ‘हामीले शेरबहादुर दाइ रेफ्री भएर फर्कनुहुन्छ भन्ने अपेक्षा गरेका थियौँ, उहाँ कसैको जर्सी लगाएर फर्कनुहुन्न भन्ने थियो,’ उनले भने– ‘तर सभापतिको नेम प्लेट राख्दैमा कोही सभापति हुने होइन, व्यवहार पनि त्यस्तै हुनुपर्छ ।’