मलेप टोलीले स्थलगत रूपमै लेखा परीक्षणको प्रारम्भिक प्रतिवेदन दिनुपर्ने ताप्लेजुङका स्थानीय तहको माग

ताप्लेजुङका स्थानीय तहका प्रमुखहरूले लेखा परीक्षणमा खटिएको मलेपको टोलीले स्थलगत रूपमै प्रारम्भिक प्रतिवेदन दिनुपर्ने माग गरेका छन्। आवश्यक प्रक्रिया र कार्यविधि समेत तय गरी कार्य सम्पादन गरेका विषयमा समेत मलेपको टोलीले बेरुजु देखाइदिने गरेको गुनासो राख्दै स्थानीय तहका प्रमुखहरूले एउटै प्रकृतिको काम र प्रक्रियाका बारेमा कतै बेरुजु देखाइदिने र कतै नदेखाइदिने गरेको भन्दै मलेपमा खटिने कर्मचारीको आचरणमाथि शंकासहित प्रश्न समेत उठाएका छन्।

लेखा परीक्षणको गुणस्तर र प्रभाव अभिवृद्धि तथा नागरिक सहभागितामा लेखा परीक्षणसम्बन्धी अन्तरक्रिया कार्यक्रमका लागि ताप्लेजुङ आइपुगेको मलेपको टोलीसँग आठराई त्रिवेणी गाउँपालिका अध्यक्ष दीपेन्द्र पोमु (दीपेन) ले पालिकाले जनशक्ति सम्भाव्यता सर्वेक्षण (ओएनएम) गरी सोहीअनुसार राखेका करारका कर्मचारीको तलबभत्ता समेतमा बेरुजु देखाइदिएको भन्दै मलेप टोलीप्रति रोष प्रकट गरे। स्थानीय सभा र कार्यपालिकाबाट पारित गरी कार्यविधि लागू गरेर दिएको कर्मचारीको स्थानीय भत्तामा समेत मलेप टोलीले बेरुजु लेखेको प्रति उनको आक्रोश थियो।