लोकप्रिय सरकारको अलोकप्रिय शैली

जेन्जी आन्दोलनको जगमा निर्वाचित झन्डै दुई तिहाइको सरकारले जनअपेक्षाअनुसार काम गर्न नसकेको भन्दै एकातिर जेन्जी अभियन्ताहरुबाटै आलोचना शुरु भएको र अर्कोतर्पm सत्तारुढ राष्ट्रिय स्वतन्त्र पार्टीभित्रैबाट असहमतिका स्वरहरु गुञ्जिन थालेकोले सरकारका लागि प्रतिकूल अवस्था निम्तिन लागेको त होइन भन्ने आशंका बढ्न थालेको छ । रास्वपाका वरिष्ठ नेता बालेन्द्र शाहको नेतृत्वमा गठित वर्तमान सरकार, विपक्षी दलहरुको कुरा छोडौं, आफ्नै दलमा आलोचित बन्ने अवस्था किन आएको होला ? जसको उम्मेदवारीबाट त्यति धेरै (१८२ स्थान) सांसदहरुले विजय प्राप्त गरे, अहिले तिनैमध्येका केही सांसदसमेत बालेनको नेतृत्वप्रति असन्तुष्टि ओकल्न थालेका छन् । जबकि मतदाताले उनीहरुको नामसमेत सुनेका थिएनन्, रास्वपाको घण्टी चुनाव चिह्नमा मतदान गरेर परिवर्तनको चाहना व्यक्त गरे । गतवर्ष भदौ २३ र २४ गतेको जेन्जी आन्दोलनपछि बनेको अन्तरिम सरकारबाट जनताले जति अपेक्षा गरेका थिए सीमित समयावधिका कारण सबै माग पूरा हुन सकेनन्, अहिलेको अवस्थामा त्योभन्दा बढी अपेक्षा वर्तमान सरकारबाट गर्नुलाई अस्वाभाविक नै मान्नु आवश्यक छैन । संख्यात्मक हिसाबले सरकार बलियो लागे पनि कार्यशैली, प्रभावकारिता र सेवा–गुणस्तरका हिसाबले प्रभावशाली बन्न नसकेको मूल्यांकन सेवाग्राहीहरुको छ ।

लोकप्रिय सरकारको कार्यशैलीमाथि प्रश्न