ग्यासको विकल्पमा विद्युतीय चुलो प्रवर्द्धन गर्न सरकारलाई सांसदको आग्रह

काठमाडौं– प्रतिनिधिसभाको आजको बैठकमा सांसदहरूले खाना पकाउने ग्यासको विकल्पका रूपमा विद्युतीय चुलोको प्रयोग बढाउन सरकारको ध्यानाकर्षण गराएका छन् । बैठकको आकस्मिक समयमा बोल्दै सांसद श्रीराम न्यौपानेले वातावरण प्रदूषण नियन्त्रण गर्न तथा खाना पकाउने ग्यासको आयात घटाउन विद्युतीय चुलोको प्रयोगलाई प्रोत्साहन गर्नुपर्ने बताए। उनले देशभित्रै उपलब्ध विद्युत्को उपयोग बढाउँदै ग्यास आयात प्रतिस्थापन गर्ने नीति लिन सरकारसँग आग्रह गरे ।

उनले मनसुनजन्य विपद्का कारण विभिन्न सडकखण्ड अवरुद्ध हुँदा सर्वसाधारणको जनजीवन प्रभावित भएको विषयमा समेत सरकारको ध्यानाकर्षण गराए । बैठकमा सांसद धनबहादुर बुढाले डोल्पामा पहिरोका कारण सडक अवरुद्ध हुँदा खाद्यान्न तथा विकास निर्माणका सामग्री ढुवानीमा समस्या भएको बताए। उनले विपद्बाट प्रभावित नागरिकलाई तत्काल राहत उपलब्ध गराउनुका साथै पुनःस्थापनाको व्यवस्था गर्न सरकारसँग माग गरे ।