अब नेपाल प्रहरी मेडिकल कलेज स्थापना गर्न ढिला गर्नु हुँदैन : सांसद पोखरेल

राष्ट्रिय स्वतन्त्र पार्टी (रास्वपा) का सांसद विश्वराज पोखरेलले नेपाल प्रहरीको आफ्नै मेडिकल कलेज स्थापना गर्न ढिला नगर्न सरकारसँग माग गरेका छन्।

मंगलबार संसदमा बोल्दै उनले अस्पताललाई अझ बलियो र समय अनुकूल बनाउन २०६४ सालदेखि नै मेडिकल कलेज स्थापनाको प्रयास गरिएको भए पनि विभिन्न कारणले पूरा हुन नसकेको बताए। अहिले अस्पतालमा १५० भन्दा बढी डाक्टर, नर्स र प्यारामेडिक्सहरू तथा अन्य आधारभूत पूर्वाधारहरू उपलब्ध रहेको उल्लेख गर्दै उनले मेडिकल कलेज स्थापनाका लागि सरकारले अनुमति दिनुपर्ने, आवश्यक सहयोग गर्नुपर्ने र बजेट निकासा गर्नुपर्ने माग राखेका हुन्।