डिजिटल प्लेटफर्मबाट व्यापार गर्ने व्यवसायीलाई सरकारको सूचना, दर्ता अनिवार्य

काठमाडौं । नेपालमा अनलाइनमार्फत वस्तु तथा सेवा बिक्री वितरण गर्ने व्यवसायीका लागि सरकारले दर्ता तथा सूचीकृत हुनुपर्ने व्यवस्था अनिवार्य गरेको छ । वाणिज्य, आपूर्ति तथा उपभोक्ता संरक्षण विभागले विद्युतीय माध्यमबाट कारोबार गर्ने सबै व्यवसायीलाई कानुनी प्रक्रिया पूरा गरेर विभागको पोर्टलमा सूचीकृत हुन आग्रह गरेको हो ।

विभागले जारी गरेको सूचनाअनुसार विद्युतीय व्यापार (ई-कमर्स) ऐन, २०८१ र विद्युतीय व्यापार (ई-कमर्स) निर्देशिका, २०८२ कार्यान्वयनमा आइसकेका छन् । सोही व्यवस्थाअनुसार अनलाइन व्यवसाय सञ्चालन गर्नुअघि व्यवसायीले विद्युतीय प्लेटफर्म स्थापना गरी विभागमा सूचीकृत हुनुपर्नेछ ।