अन्नपूर्ण आधारशिविरसम्मको पदमार्ग खुलाउँदै स्थानीय

मोदी खोलामा आएको बाढीले गत विहीबार मध्यरात कास्कीको अन्नपूर्ण गाउँपालिकाको माथिल्लो क्षेत्रको प्रवेशद्वारमा ब्यापक क्षति गर्यो। बाढीले अन्नपूर्ण गाउँपालिका–८ वीरेठाँटीको बजार जोखिममा त पार्यो नै गाउँपालिकाको चारवटा वडासँगको यातायात सञ्जाल पूर्णरुपमा बिच्छेद गरेको थियो। अन्नपूर्ण आधारशिविर (एबिसी) को प्रवेशद्वार (वीरेठाँटी) मै भएको ब्यापक कटानले यातायात मात्र नभई पैदलयात्रामा समेत जोखिम थपिएको थियो।

अन्नपूर्ण क्षेत्रको घान्द्रुक, घोरेपानी, छोमरोङ हुँदै अन्नपूर्ण आधारशिविर (एबिसी)सम्मको सडक सम्पर्कलाई वीरेठाँटीको पहिरोले बिच्छेद गरिदिएको थियो। सडक सञ्जाल बिच्छेद भएपछि सुरुका दुइदिन पूर्ण रुपमा हिडडुल पनि रोकियो। तर, अहिले बिस्तारै पदयात्रामा पर्यटक जान थालेका छन् भने सवारी संचालन लागि वीरेठाँटीमा काम थालिएको छ। खोलाको भेल कम भएको मौका पारेर मंगलबारदेखि डोजर परिचालन गरेर सडक खुलाउने प्रयास थालिएको गाउँपालिकाले बताएको छ।