सञ्चयकोषको प्रशासकमा कटवाललाई नियुक्त गर्ने सरकारको अन्तिम तयारी, कर्मचारी रुष्ट

कर्मचारी सञ्चयकोषको नयाँ प्रशासक नियुक्ति प्रक्रिया अन्तिम चरणमा पुगेसँगै अवकाशको मुखमा रहेका सहप्रशासक जीवनकुमार कटवाललाई पाँच वर्षका लागि नियुक्त गर्ने तयारीले विवाद चर्किएको छ।

कर्मचारी सञ्चयकोषको प्रशासक पदका लागि असार ८ गते आवेदन आह्वान गरिएकोमा कोषभित्रका ११ जना कर्मचारीले आवेदन दिएका थिए। त्यसपछि अर्थ मन्त्रालयले पाँचजनाको नाम सर्टलिस्ट गरी अन्तर्वार्ता लिएको थियो। उम्मेदवार छनोट तथा सिफारिस समितिले कटवालसहित तीनजनाको नाम सरकारसमक्ष सिफारिस गरेको र कटवाल पहिलो नम्बरमा रहेको स्रोतको दाबी छ। यद्यपि अर्थ मन्त्रालयले सिफारिस सूचीबारे औपचारिक जानकारी सार्वजनिक गरेको छैन।