चीनबाट गेडा धनिया आयातमा रोक, ‘खपराज’ किरा भित्रिने डर

काठमाडौं । चीनबाट नेपालतर्फ आयात गरिएको ठूलो परिमाणको धनियाको दानामा हानिकारक ‘खपराज’ किरा भेटिएपछि प्लान्ट क्वारेन्टाइन तथा बिषादी व्यवस्थापन केन्द्रले उक्त खेपलाई भन्सार नाकामै रोक्का गरेको छ । तातोपानी नाका हुँदै भित्रिएको करिब ३० टन गेडा धनियामा अन्तर्राष्ट्रियस्तरमै प्रतिबन्धित क्वारेन्टाइन पेस्ट (किरा) भेटिएको हो ।

प्लान्ट क्वारेन्टाइन तथा विषादी व्यवस्थापन केन्द्रका सूचना अधिकारी एवं वरिष्ठ बाली संरक्षण अधिकृत रोशन अधिकारीका अनुसार, उक्त धनियाको खेपमा ‘नन–कम्प्लायन्स’ (मापदण्ड विपरीत) पाइएको छ । प्रयोगशाला परीक्षणका क्रममा धनियामा ‘खपराज’ नामक किरा फेला परेको हो । जसलाई कृषि र खाद्य सुरक्षाका दृष्टिले निकै खतरनाक मानिन्छ ।