सिम्रन खड्काः ‘गौंथली’ देखि ‘मास्टर्नी’ सम्म, छोटो यात्रामै फराकिलो बन्दै करिअर

काठमाडौं– नेपाली फिल्म क्षेत्रमा नयाँ पुस्ताका कलाकारको आगमन बाक्लिँदै गर्दा केही कलाकारले छोटो समयमै आफ्नो अलग पहिचान बनाउन सफल भइरहेका छन् । यही सूचीमा पछिल्लो समय तीव्र गतिमा अगाडि बढिरहेकी अभिनेत्री हुन्– सिम्रन खड्का । अभिनयप्रतिको लगाव, फरक पात्र निर्वाह गर्ने चाहना र पर्दामा आफूलाई प्रमाणित गर्ने प्रयासले सिम्रनको करिअर अहिले विस्तारै बलियो बन्दै गएको छ ।

एक महिनाअघि प्रदर्शनमा आएको फिलम ‘गौंथली’ ले सिम्रनलाई नेपाली दर्शकमाझ नयाँ परिचय मात्र दिएन, उनको अभिनय क्षमताको पनि चर्चा गरायो । बेलायतका डेन्टिस्ट डा। कपिल रिजालले निर्देशन गरेको यो फिल्मले बक्स अफिसमा पनि उत्साहजनक व्यापार गरिरहेको छ । प्रदर्शनको करिब एक महिनामै फिल्मले झण्डै २३ करोड रुपैयाँ ग्रस कलेक्सन गरिसकेको बताइएको छ ।