पर्यटक बढे, होटलको नाफा घट्यो

काठमाडौं । नेपालमा विदेशी पर्यटक आगमनले नयाँ उचाइ कायम गरेको वर्ष होटल तथा पर्यटन क्षेत्रका सूचीकृत कम्पनीहरूको वित्तीय अवस्था भने अपेक्षाअनुसार उत्साहजनक देखिएन । नेपाल स्टक एक्सचेन्ज (नेप्से) मा सूचीकृत होटल तथा केबलकारसम्बन्धी आठ कम्पनीले आर्थिक वर्ष २०८२/८३ मा समग्रमा २५ करोड ५९ लाख रुपैयाँ घाटा व्यहोरेका छन् ।

अघिल्लो आर्थिक वर्षमा यही समूहका कम्पनीले १ अर्ब रुपैयाँभन्दा बढी खुद नाफा गरेका थिए । यसपटक पर्यटक संख्या बढे पनि होटल सञ्चालनमा आएको अवरोध, भौतिक क्षति, मर्मतसम्भार, बढ्दो प्रतिस्पर्धा र बाह्य पर्यटन बजारमा देखिएको अस्थिरताले आम्दानीमा दबाब परेको वित्तीय विवरणले देखाएको छ ।