बीपीको जुत्तामा नापो नमिलेका खुट्टाहरू !

‘मेरो काठमाण्डूको सार्वजनिक सभामा मलाई र सुशीलालाई चुटाउनु भयो ठूल्दाजुले । एउटा वासुपासा भन्ने छ, उसले रिभल्वर लिएको थियो । गुण्डाहरूलाई सञ्चालन गर्नुभयो । त्यसको पछि त्रिपुरवर सिंह छ । सभामा म बोलिरहेको मञ्चमा वासुपासा माथि जान्छ र मलाई घचेट्छ र पिट्छ । त्यो गराउनुभयो वहाँले ।’

नेपाली कांग्रेसभित्र घात, अन्तर्घात र प्रतिघात कतिसम्म चल्छ भन्ने सात दशकअघि बीपी स्वयंको भोगाइबाट प्रष्ट हुन्छ । सत्ताको निर्मम चरित्रले नेतालाई विवेक शून्य गराउँछ । इमान बन्धक बनाउँछ । सत्ता र शक्तिमा पुगेपछि नयाँ ग्रहबाट चाटुकारहरू जन्मन्छन् । नेताहरूलाई मान्छेबाट देवत्वकरण गर्ने होड चल्छ । त्यही देवत्वकरणले इतिहासमा कोही राजेन्द्रलक्ष्मी, राम शाह, रणबहादुर शाह, राजेन्द्रविक्रम शाह, त्रैलोक्यविक्रम शाहदेखि जङ्गबहादुर, भिमसेन थापाजस्ता पात्रहरू नाम बदनाम बोकेर बिदा हुन्छन् ।