२५ वर्षपछि वीरगन्ज चिनी कारखाना खुल्ने आशा, उखु किसानमा उत्साह

करिब २५ वर्षदेखि बन्द रहेको वीरगन्ज चिनी कारखाना पुनः सञ्चालनका लागि सरकारले प्रक्रिया अघि बढाएसँगै मधेस प्रदेशका उखु किसानमा आशा र उत्साह बढेको छ। सरकारले कारखानाको वर्तमान अवस्था, पुनः सञ्चालनको सम्भाव्यता, चुनौती तथा आवश्यक कार्ययोजना अध्ययन गर्न कार्यदल गठन गरेपछि किसानले लामो समयदेखि भोग्दै आएको उखुको बजार समस्यामा सुधार आउने अपेक्षा गरेका छन्।

उद्योग, वाणिज्य तथा आपूर्तिमन्त्री गौरीकुमारी यादवको पहलमा सरकारले वीरगन्ज चिनी कारखाना पुनः सञ्चालनका लागि आवश्यक अध्ययन गरी सुझाव दिन कार्यदल गठन गरेको हो। कार्यदललाई कारखानासम्बन्धी विगतका निर्णय, यसअघि भएका अध्ययन तथा तयार पारिएका प्रतिवेदनको समीक्षा गर्दै अब चाल्नुपर्ने कदम सिफारिस गर्ने जिम्मेवारी दिइएको छ। कार्यदलले १५ दिनभित्र अध्ययन प्रतिवेदन मन्त्रालयमा पेस गर्नुपर्नेछ।