गर्वलाग्दा बन्नुपर्छ गौरवका आयोजना

राष्ट्रिय गौरवका आयोजना मुलुकको विकासका साधारण परियोजना होइनन्। यस्ता आयोजना राष्ट्रको दीर्घकालीन आर्थिक रूपान्तरण, उत्पादन वृद्धि, रोजगारी सिर्जना र नागरिकको जीवनस्तर सुधारसँग जोडिएका हुन्छन्। त्यसैले राष्ट्रिय गौरवका आयोजना वर्षौंसम्म अलपत्र पर्ने, लागत बढ्दै जाने र निर्माण सम्पन्न हुने मिति पटक–पटक सर्ने प्रवृत्ति विकासप्रतिको गम्भीर बेवास्ता हो। सरकारले अब केही राष्ट्रिय गौरवका सिँचाइ आयोजना निश्चित समयसीमाभित्र सम्पन्न गर्ने लक्ष्यसहित काम अघि बढाउने तयारी गरेको छ। यो सकारात्मक सुरुवात हो। तर विगतको अनुभवले लक्ष्य घोषणा मात्र पर्याप्त नहुने स्पष्ट गरिसकेको छ। अब लक्ष्यलाई ठोस कार्ययोजना, जिम्मेवारी, समयसीमा र जवाफदेहितासँग जोड्नुपर्छ।

सरकारले लगभग चार दशकअघि सुरु भएका बबई सिँचाइ, भेरी–बबई डाइभर्सन, सिक्टा सिँचाइ, रानी जमरा–कुलरिया सिँचाइ तथा सुनकोसी–मरिन डाइभर्सन आयोजनालाई आगामी दुईदेखि पाँच वर्षभित्र सम्पन्न गर्ने लक्ष्य अघि सारेको छ। बबई र भेरी–बबईलाई आगामी दुई वर्षभित्र तथा सिक्टा, रानी जमरा–कुलरिया र सुनकोसी–मरिनलाई पाँच वर्षभित्र सम्पन्न गर्ने लक्ष्य छ। लामो समयदेखि सुस्त रहेका आयोजनालाई निश्चित समयसीमासहित अघि बढाउने सरकारी तयारीलाई सकारात्मक रूपमा लिनुपर्छ। विकास आयोजनाको सफलता घोषणा गरिएको बजेटमा होइन, निर्धारित समयमा निर्माण सम्पन्न भएर नागरिकले सेवा पाएको अवस्थामा देखिन्छ।