बजेट पार्न मरिहत्ते : कार्यान्वयनमा सधैं लफडा

दाङको घोराही उपमहानगरपालिका–१८ स्थित अम्बिकेश्वरी मन्दिरसम्म पुग्ने सडक सजावटका लागि भन्दै लुम्बिनी प्रदेश सरकारबाट १५ लाख रुपैयाँ बजेट विनियोजन भयो। बजेटले मितेरी हस्पिटलदेखि मन्दिरसम्म पुग्ने सडक सजावट गर्ने मागलाई सम्बोधन गरेको थियो तर प्रदेश सरकार उद्योग, पर्यटन तथा यातायात मन्त्रालयबाट विनियोजित उक्त बजेट खर्च नभएर ‘फ्रिज’ भयो।

स्थानीयका अनुसार बजेट कार्यान्वयनमा राजनीतिक दलको स्वार्थ हाबी भयो। सडक सजावट रोक्ने योजनामा गाउँलेको एउटा समूह एक कित्तामा उभियो। अझ यसमा स्थानीय जनप्रतिनिधिसमेत सामेल भए। घोराही उपमहानगरपालिका–१८ का वडाध्यक्ष नै यो योजना कार्यान्वयन नगरेर सडक सजावटका लागि विनियोजित बजेट मन्दिर परिसरमै भौतिक पूर्वाधार निर्माणमा खर्चनुपर्ने पक्षमा देखिए। ‘प्रदेश सरकारबाट विनियोजन भएको रकमले मन्दिरसम्म जोड्ने सडक सजावटलाई सम्बोधन गरेको थियो तर यो सडकमा सजावट पूर्वाधार निर्माण नगर्न स्थानीय जनप्रतिनिधिसहितको दबाब आयो,’ एक स्थानीय भन्छन्, ‘बजेटको शीर्षकमा उल्लेख भएभन्दा फरक योजनाको काम नहुने नीतिका कारण काम हुन सकेन।’