गाउँ–गाउँमा पुगेका ‘राविसे’ सँग डराएको पञ्चायती शासक

तीसवर्षे पञ्चायतको मध्यतिर अर्थात् तीसको दशकमा ‘राष्ट्रिय विकास सेवा’ अर्थात् ‘राविसे’ (राविसे नाम भए पनि विशेषणका रूपमा प्रयोग गरिएको छ) हरू पहाडका कुनाकाप्चादेखि देहातका गाउँसम्म फैलिएका थिए । तिनीहरू पहाडी गाउँ र देहातका निम्ति नयाँ अनुहार थिए । हुन पनि पूर्वका पश्चिम र पश्चिमका पूर्वतिर खटेका थिए । अनि तराईका पहाडतिर र पहाडी भेगका तराईतिर पुगेका थिए ।

विश्वविद्यालयमा स्नातकोत्तर दोस्रो वर्षमा अध्ययनरत विद्यार्थी थिए, राविसे । तिनको गाउँ–देहात घुमफिर अवधि लामो रहेन, केवल चार–पाँच वर्ष मात्रै । त्यो कालमा गाउँ–घरमा कुनै नयाँ अनुहार देखापरे भनिन्थ्यो, ‘राविसे माड्साप रहेछ ।’