निर्माण व्यवसायी सङ्घ धनुषाद्वारा तालाबन्दी

धनुषा । भुक्तानी प्रक्रिया अवरुद्ध भएको भन्दै निर्माण व्यवसायी सङ्घ धनुषाले विभिन्न कार्यालयहरूमा तालाबन्दी गरेको छ । बुधबार निर्माण व्यवसायीहरूले पूर्वाधार विकास कार्यालय र कोष लेखा तथा नियन्त्रकको कार्यालयमा तालाबन्दी गरेका हुन् ।

आर्थिक वर्षको अन्तिम दिनसम्म पनि सम्पन्न तथा अन्तिम चरणमा पुगेका योजनाको भुक्तानी हुन नसकेपछि निर्माण व्यवसायी आन्दोलित भएका हुन् । निर्माण व्यवसायी सङ्घ धनुषाका पूर्वमहासचिव विनोद कर्णले असार मसान्तमा विकास बजेट खर्च गर्ने समयमै भुक्तानी रोकिँदा निर्माण व्यवसायी गम्भीर आर्थिक सङ्कटमा परेको बताए ।