सुनीता आहुजाले फिर्ता लिइन् गोविन्दाविरुद्धको सम्बन्धविच्छेद मुद्दा

बलिउड अभिनेता गोविन्दा र उनकी पत्नी सुनीता आहुजाबीच लामो समयदेखि चलिरहेको वैवाहिक विवादले नयाँ मोड लिएको छ। गोविन्दाका म्यानेजर शशी सिन्हाले अगस्ट १९ मा सुनीताले गोविन्दाविरुद्ध दायर गरेको सम्बन्धविच्छेदको निवेदन फिर्ता लिएको पुष्टि गरेका छन्।

सुनीताले करिब दुई वर्षअघि सम्बन्धविच्छेदको प्रक्रिया सुरु गरेको बताइएको छ। उनी अगस्ट १९ मा छोरा यशवर्धन आहुजासँग मुम्बईको बान्द्रा पारिवारिक अदालतमा पुगेकी थिइन्। त्यसपछि उनीहरूले सम्बन्धविच्छेद गर्ने हुन् कि भन्ने चर्चा फेरि चुलिएको थियो। तर त्यही क्रममा गोविन्दाका म्यानेजरले मुद्दा फिर्ता लिइएको जानकारी दिएका हुन्।