ठगीको  नयाँ जालो

जसरी कुनै प्रतिस्पर्धामा भाग नलिएको व्यक्तिले प्रतियोगिता जित्दैन, त्यसैगरी कुनै चिठ्ठा नकिनेको वा नहालेको व्यक्तिलाई चिठ्ठा पर्दैन। यति सामान्य ज्ञान पनि नराख्दा तपाईंलाई ‘चिठ्ठा परेको छ’ भनेर आउने फोन कललाई विश्वास गर्दा कैयौं नेपाली ठगीमा परेका छन्। त्यतिमात्रै नभई तपाईंलाई उपहार आएको छ, अथवा जागिरको अवसर छ, सस्तोमा सामान किन्न पाइन्छ जस्ता लोभलाग्दा प्रस्तावमा लठ्ठिँदा ठगिएका छन्।

नेपालभर दर्ता आर्थिक अपराधका मुद्दाको ग्राफले यस्ता अनेक ठगीको मात्रा देखाउँछ। आर्थिक वर्ष २०८१/८२ मा १६ हजार ५ सय मुद्दा आर्थिक अपराधसँग सम्बन्धित थिए। सँगै नेपाल प्रहरीमा साइबर अपराधसम्बन्धी १८ हजार ९ सय निवेदन दर्ता भए। सामाजिक सञ्जाल फेसबुक, टिकटक र ह्वाट्सएपजस्ता माध्यमबाट अपराध र ठगी भइरहेका छन्। अर्थात् सामाजिक सञ्जाल जसरी हातहातको मोबाइल फोनमा उपलब्ध छ, ठगी र अपराधको मात्रा पनि उत्तिकै फैलिएको छ। ठगी डिजिटल दुनियाँको डरलाग्दो पाटो बनेको छ।