उषाकिरण भन्छिन् : नेताका अघिपछि लाग्नेहरूको अराजनीतिक अभिव्यक्ति साइबर ब्युरोमा पुर्‍याउँदै छु

नेकपा एमालेकी नेतृ उषाकिरण तिम्सेनाले पार्टीमा रूपान्तरण र पुस्तान्तरणको विषयमा बहस हुँदा केही व्यक्तिबाट अश्लील र स्त्रीद्वेषी अभिव्यक्ति आएको बताएकी छिन्।

नेकपा एमालेभित्र नेतृत्वको कार्यशैली र विशेष गरी पार्टी अध्यक्ष केपी शर्मा ओलीको विरोध गर्दै आएकी भन्दै उनले सामाजिक सञ्जालमा लेखेकी छिन्, ‘रूपान्तरण, हस्तान्तरण र पुस्तान्तरण गर्दा पनि अब एमाले कस्तो हुन्छ ? त्यो पनि अनिश्चित छ। कुनै विषयमा छलफल गर्दा एमालेका केही व्यक्ति र खासगरी नेताका अघिपछि लागेर हिँड्नेहरूको अभिव्यक्ति हदसम्मको अश्लील, अराजनीतिक र स्त्रीद्वेषी देखेको छु। तपाईंहरूको चेतना टिप्पणी लायक वा समाजका अगाडि भन्न लायक त छैन, तर नेताका अघिपछि लाग्नेहरूको चेतना यो स्तरको हुनु विडम्बनापूर्ण छ। केही स्क्रिनसटहरू प्रहरीको साइबर ब्युरोमा बुझाउने नै छु।’