बञ्चरेडाँडाका स्थानीय आन्दोलित : फोहोरका गाडी एक घण्टा रोकिए, माग पूरा गर्न अल्टिमेटम

६ भदौ, काठमाडौं । बञ्चरेडाँडाका स्थानीयले काठमाडौं उपत्यकाबाट फोहोर बोकेर गएको गाडीलाई एक घण्टा रोकेका छन् । वैज्ञानिक प्रविधिबाट फोहोर व्यवस्थापन नभएकाले गाउँभरी दुर्गन्ध फैलिएपछि स्थानीय आन्दोलित भएका हुन् ।

विगतको सहमति पनि कार्यान्वयन नभएकाले आन्दोलनमा उत्रन बाध्य भएको सिसडोल बन्चरे डाँडा फोहोर व्यवस्थापन सरोकार केन्द्रका अध्यक्ष निरञ्जन सन्जेलले बताए । ‘आज बिहान १ घण्टाको लागि बञ्चरेडाँडामा रोकेका हौं । १५ दिन भित्र माग सम्बोधन नभए फोहोर खन्याउन रोक लगाउँछौं’, उनले भने, ‘फोहोर र मान्छे सँगै बस्ने स्थिति छैन ।’