‘साकेला श्रम अभियान’ले श्रम संस्कार स्थापित हुँदै

खोटाङको साकेला गाउँपालिकाले सञ्चालन गरेको श्रमदान कर्मले संस्कारको रूप लिँदै गएको छ। विकास र सुशासनका लागि श्रम अनिवार्य भन्ने उद्देश्यका साथ दुई वर्षदेखि सञ्चालनमा ल्याइएको श्रमदान अभियानलाई व्यवहारमा उतार्न श्रम संस्कार अनिवार्य सर्त मान्दै अघि बढेको गाउँपालिकाले तमाम गाउँवासीलाई श्रम सँस्कृतिमा अभ्यस्त गराउँदै लगेको छ।

पछिल्लो समय साकेलाले सञ्चालन गरेको ‘साकेला श्रम अभियान’अन्तर्गतको एउटा सानो नमूना गाउँपालिका केन्द्र परिसरको स्वरुप परिवर्तनले प्रमाणित गरेको छ। गाउँमुकाम मानेभञ्ज्याङस्थित पालिका परिसरमा अहिले क्रिसमस ट्री, धुपी, सयपत्री, मखमली, बेली, चमेली, गोदावरीलगायत विभिन्न प्रजातिका फूलले छपक्कै ढाकेको छ। बिरुवा रोपण, गोडमेल र संरक्षणसँगै फोहोर व्यवस्थापनको कामलाई कार्यतालिकाभित्रै राखेका जनप्रतिनिधि र कर्मचारीले अस्तीभन्दा हिजो र हिजोभन्दा आज गाउँपालिका परिसर आकर्षक, झकिझाउ र सुन्दर बनाउँदै लगेको छ।