सीआईबीको अनुसन्धानमा रहेको डीडीसीको प्रवर्द्धनमा प्रधानमन्त्री

मंगलबार (२६ जेठ) बसेको मन्त्रिपरिषद् बैठकमा प्रधानमन्त्री वालेन्द्र शाहसहित मन्त्रीहरूलाई दुग्ध विकास संस्थान (डीडीसी)का उत्पादनहरू बाँडिएको देखियो। डीडीसीद्वारा उत्पादित चिज, पनिर, नौनी, दही, पेडालगायत उत्पादन कृषि, वन तथा पर्यावरणमन्त्री गीता चौधरीले मन्त्रिपरिषद् सदस्यहरूलाई बाँडेकी थिइन्।

किसानलाई दूधको पैसा भुक्तानी नगरेको र सधैँजसो घाटामा डुबिरहेको डीडीसीबारे पछिल्लो समय नेपाल प्रहरीको केन्द्रीय अनुसन्धान ब्युरो (सीआईबी)ले अनुसन्धान गरिरहेको छ। अनुसन्धानमा रहेको संस्थाको उत्पादन मन्त्रीहरूलाई बाँडिएन मात्र, दुग्धजन्य पदार्थको परिमाण र गुणस्तरबारे प्रश्न उठिरहँदा मन्त्री चौधरीले बैठकमा डीडीसीका उत्पादनलाई प्रवर्द्धन गर्नुपर्ने अजेन्डा उठाएको भनेर प्रचार पनि गरियो।