हलेसी तुवाचुङका तीन विपन्न परिवारले पाए भूकम्प प्रतिरोधी घर

खोटाङ – हलेसी तुवाचुङ नगरपालिकाले आफ्नै लगानीमा घर निर्माण गर्न नसक्ने तीन विपन्न परिवारलाई भूकम्प प्रतिरोधी नयाँ घर बनाएर हस्तान्तरण गरेको छ । नगरपालिकाले प्रतिपरिवार ५ लाख रुपैयाँ लगानीमा दुई कोठाको एकतले घर निर्माण गरिदिएको हो ।

लामो समयदेखि जीर्ण घरमा बस्दै आएका हलेसी तुवाचुङ–२ डिकुवाका देशवीर राई, वडा नं ६ मङ्गलटारका अपाङ्गता भएका दाजुबहिनी चामे र भया दमाई तथा घरविहीन अवस्थाका वडा नं १० अर्खौलेका टेकबहादुर सार्कीको परिवारलाई नगरपालिकाले नयाँ घर हस्तान्तरण गरेको छ । नयाँ घर पाएपछि उनीहरू हर्षित भएका छन् ।