दर्ता, नवीकरणबिनै शैक्षिक परामर्श

नेपालबाट उच्च शिक्षाका लागि विदेश जाने विद्यार्थीको संख्या बढेसँगै शैक्षिक परामर्श व्यवसाय पनि विस्तार भएको छ । तर शैक्षिक परामर्श दिने उद्देश्यले खोलिएका संस्थाको लगानी सुरक्षा, सेवा गुणस्तरलगायतका विषयमा नियमन हुन नसक्दा अनेक प्रश्न उब्जिएका छन्।

हाल संघीय शिक्षा तथा खेलकुद मन्त्रालयमा दर्ता भएका ७६० वटा र प्रदेश सरकारका सामाजिक विकास मन्त्रालयअन्तर्गत दर्ता भएका ५२२ वटा शैक्षिक परामर्श संस्था सञ्चालनमा छन् । नेपाल शैक्षिक परामर्श व्यवसायी महासंघका अध्यक्ष राजेन्द्र बरालका अनुसार यस्ता संस्थाहरुले चिकित्सा, इन्जिनियरिङ, कानुन, सिए, नर्सलगायत विधामा अध्ययन गर्न चाहनेलाई सही, सत्य र तथ्यमा आधारित भएर परामर्श दिँदै आएका छन् । ‘यस्ता संस्थामा निजी क्षेत्रको १८ अर्ब रुपैयाँ बढी लगानी छ भने करिब ३५ हजारले रोजगारी पाएका छन्’, बरालले भने, ‘तर हाम्रो लगानीको सुरक्षा प्रत्याभूति राज्यले गर्न सकेको छैन।’