विराट राजाको दरबार निर्माण : योजना बनाउँदै, थन्क्याउँदै

विराटनगर–१८ भेडियारीस्थित विराट राजाको दरबार निर्माणको चर्चा चलेको लामो समय भए पनि अझैसम्म दरबार निर्माणको काम अघि बढेको छैन। विराटनगर महानगरपालिका र कोशी प्रदेश सरकारले हरेक वर्षको बजेटमा विराट राजाको दरबार निर्माण र संरक्षणको विषय समावेश गरे पनि काम भने अघि बढ्न सकेको छैन।

विराटनगर महानगरपालिकाले विराट राजाको दरबार निर्माण गर्न गुरुयोजना तयार पारेको छ। तर, गुरुयोजना तयार पारेको आठ वर्ष पुग्न लाग्दासमेत विराट राजाको दरबार निर्माणको काम सुरु भएको छैन। विराट राजाको दरबार निर्माणका लागि उद्योगी सुरेन्द्र गोल्छाको संयोजकत्वमा विराट राजाको दरबार निर्माण समितिसमेत गठन गरिएको थियो। विराटनगर महानगरपालिकाका तत्कालीन मेयर भीम पराजुलीले विराट राजाको दरबार निर्माणको योजना अघि बढाएका थिए। हाल उनी कोशी प्रदेशका पर्यटन, वन तथा वातावरण मन्त्री छन्। विराटनगर महानगरपालिकाको मेयर हुँदा अघि बढाएको योजनाले अझै पनि सफलता पाउने सम्भावना देखिएको छैन।