विपद्पछिको उद्धार कि पूर्वसूचना ? भोटेकोसीले देखाएको हिमाली जोखिम र प्रविधिको आवश्यकता

काठमाडौँ – भोटेकोसी–त्रिशूली तटीय क्षेत्रमा भदौ १० मा आएको विनाशकारी बाढीले नेपाललाई फेरि एउटा गम्भीर प्रश्नको सामना गराएको छ- हामी विपद् आएपछि मात्र उद्धार गर्ने देश बन्ने कि सम्भावित जोखिम पहिल्यै पहिचान गरेर जनधन जोगाउने प्रणाली विकास गर्ने ?

बाढीले ठूलो मानवीय र भौतिक क्षति पुर्‍याएको आठौँ दिन बितिसक्दा पनि धेरै परिवार बेपत्ता आफन्तको प्रतीक्षामा छन् । नेपाली सेना र अन्य सुरक्षा निकाय उद्धारमा परिचालित भए पनि स्वास्थ्य सेवा, राहत वितरण र प्रभावितको पुनःस्थापनामा सरकारी संयन्त्र अपेक्षाअनुसार प्रभावकारी बन्न नसकेको गुनासो बढिरहेको छ । विभिन्न जलविद्युत् आयोजनामा फसेका नागरिकको उद्धारमा भएको ढिलाइले पनि सरकारप्रति प्रभावित र सर्वसाधारणको आक्रोश बढाएको छ । तर यो विपद्ले केवल उद्धार र राहत व्यवस्थापनको कमजोरी मात्र देखाएको छैन, यसले नेपालको बाढी पूर्वसूचना प्रणाली कस्तो जोखिमका लागि तयार छ भन्ने गम्भीर प्रश्न पनि उठाएको छ ।