प्रजनन दर प्रतिस्थापन तहभन्दा तल झर्नु अस्वाभाविक

काठमाडौं नेपालको जनसंख्यामा देखिएको तीव्र परिवर्तनलाई नीतिगत तहबाटै सम्बोधन हुनैपर्ने एक कार्यक्रमका सहभागीहरूले बताएका छन्। जनसंख्याका विभिन्न सूचकमा पछिल्ला दशकहरूमा देखिएको बदलावको असर देशको राजनीति, सामाजिक, आर्थिक तथा भौगोलिक क्षेत्रमा देखिएको उनीहरूले बताए।

नेकपा एमालेका संसदीय दल र नेसनल डेमोक्रेटिक इन्स्टिच्यूट (एनडिआइ) ले आयोजना गरेको सांसद अभिमुखीकरण कार्यक्रममा जनसंख्या अध्येता चेतन अधिकारीको प्रस्तुतिमाथि छलफल गर्दै सांसदहरूले यस्तो बताएका हुन्। ‘नेपालको जनसांख्यिकीय परिवर्तन तथा जनसंख्या प्रवृत्ति : नीतिगत प्रभाव’ विषयमा अधिकारीले कार्यपत्र प्रस्तुत गरेका थिए। अधिकारीले नेपालको जनसंख्याको वृद्धिदर अप्रत्यासित रूपमा घटेको, हिमाल र पहाडका जिल्लाहरूको जनसंख्या नै घटेको, बसाँइसराइ तीव्र रूपमा बढेको, जन्मदर घटेको, युवा जनसंख्या बढेको र ज्येष्ठ नागरिकको जनसंख्या पनि तीव्र रूपमा बढिरहेकोले यस्ता विषयलाई विधायिकाले अनदेखा गर्नु नहुने उल्लेख गरेका छन्।