शैक्षिक परामर्श क्षेत्रलाई 'अपराधीकरण' नगर्न र 'मिडिया ट्रायल' रोक्न इक्यानको माग

काठमाडौँ- नेपाल शैक्षिक परामर्श संघ (ECAN) ले पछिल्लो समय काठमाडौँ उपत्यका लगायत देशका विभिन्न स्थानमा शैक्षिक परामर्श संस्थाहरूमाथि भइरहेको अनुगमन, छापा, धरपकड र प्रशासनिक नियन्त्रणका कारबाहीहरूप्रति आफ्नो आधिकारिक धारणा सार्वजनिक गरेको छ। संघले एक विस्तृत नीतिगत वक्तव्य (Policy Statement) जारी गर्दै अनुसन्धानका नाममा समग्र क्षेत्रलाई नै शंकास्पद र अपराधीकरण (Blanket Criminalization) गर्ने प्रवृत्तिको कडा विरोध गरेको छ।

इक्यानले ठगी, झुटा आश्वासन, नक्कली कागजातको प्रयोग, मानव तस्करी वा अवैध आर्थिक कारोबारमा संलग्न जोसुकैलाई कानुन बमोजिम कडा कारबाही हुनुपर्ने कुरामा आफू पूर्ण सहमत रहेको स्पष्ट पारेको छ। तर, सीमित घटनालाई आधार बनाएर स्थापित र वैधानिक संस्थाहरूको प्रतिष्ठामा आँच पुर्याउने र व्यवसायीहरूको मनोबल कमजोर बनाउने काम भइरहेकोमा आपत्ति जनाएको छ।