शान्ति चाहिएको छ, तर आत्मसमर्पण कुनै मूल्यमा गरिन्नः जेलेन्स्की

किभ । युक्रेन रुससँग गएको साढे ४ वर्षदेखि चलिरहेको युद्ध अन्त्य गर्न चाहन्छ । उसलाई यतिबेला सबैभन्दा धेरै केही चाहिएको छ भने त्यो शान्ति नै हो । तर रुससामु कुनै पनि मूल्यमा आत्मसमर्पण नगर्ने युक्रेनका राष्ट्रपति भोलोदिमिर जेलेन्स्कीले सोमबार बताएका छन् । युक्रेनको स्वतन्त्रता दिवसका अवसरमा आयोजित कार्यक्रममा उनले यस्तो अडान दोहोर्‍याएका हुन् । युक्रेनले सोभियत संघबाट स्वतन्त्रता प्राप्त गरेको ३५औँ वर्षगाँठ मनाइरहेका बेला बेलायतका प्रधानमन्त्री एन्डी बर्नहम र युरोपेली परिषद्का अध्यक्ष एन्टोनियो कोस्टालगायत विदेशी नेता तथा विशिष्ट अतिथि किभ पुगेका थिए ।

युक्रेनलाई समर्थन गर्ने देशहरूको समूह ‘कोअलिसन अफ द विलिङ’ को बैठकमा बर्नहमले सोमबार सहअध्यक्षता गर्ने कार्यक्रम थियो । प्रधानमन्त्रीका रूपमा यो उनको किभको पहिलो भ्रमण हो । ‘युक्रेन पक्कै पनि शान्ति चाहन्छ, तर ऊ केवल आत्मसमर्पण गर्न तयार छैन,’ जेलेन्स्कीले टेलिग्राममा सार्वजनिक गरिएको भिडियो सन्देशमा भनेका छन् । भिडियोमा उनी किभस्थित सुनौलो गुम्बज भएको सेन्ट माइकल मठअगाडिको चोकमा परम्परागत युक्रेनी कढाइ गरिएको पोसाकमा उभिएका देखिन्छन् । त्यहाँ रुसी आक्रमणमा नष्ट भएका ट्यांकरहरू प्रदर्शनमा राखिएका छन् ।