गणेश नेपालीको मृत्युमा सरकार जिम्मेवार, निष्पक्ष छानबिन गर्ने सांसद थपलियाको माग

नेपाली कांग्रेसकी सांसद सिता थपलिया उर्मिलाले राहदानी विभागअगाडि आत्मदाह गरेका मुगुका २५ वर्षीय गणेश नेपालीको मृत्युको जिम्मेवारी सरकारले लिनुपर्ने बताएकी छन्। उनले नागरिक आफ्नै शरीरमा आगो लगाउन बाध्य हुनु राज्यको असफलताको संकेत भएको उल्लेख गर्दै घटनाको निष्पक्ष छानबिन र सरकारको जवाफदेहिता माग गरेकी छन्।

शुक्रबार प्रतिनिधिसभा बैठकमा बोल्दै सांसद थपलियाले गणेश नेपालीको घटनाले राज्यका सेवा प्रणाली र नागरिकप्रतिको संवेदनशीलतामाथि गम्भीर प्रश्न उठाएको बताइन्। उनले विगतमा प्रेम आचार्यको आत्मदाहको घटना स्मरण गर्दै त्यतिबेला उठाइएका प्रश्नहरूको सन्दर्भमा वर्तमान सरकारको भूमिकामाथि पनि प्रश्न उठाइन्।