चिया क्षेत्रको अध्ययन प्रतिवेदन : भारतको नयाँ नीतिले निर्यातमा गम्भीर संकट

नेपालको चिया क्षेत्रमा हाल देखिएका समस्या समाधान तथा समग्र निर्यात प्रवर्द्धनका लागि गठित विशेष अध्ययन कार्यदलले आफ्नो प्रतिवेदन शुक्रबार उद्योग, वाणिज्य तथा आपूर्ति मन्त्री गौरिकुमारी यादवसमक्ष बुझाएको छ। मन्त्रालयका सहसचिव बुद्धबहादुर गुरुङको संयोजकत्वमा गठित नौ सदस्यीय कार्यदलले तीव्र गतिमा काम गर्दै केवल दुई साताको छोटो अवधिमा यो महत्त्वपूर्ण प्रतिवेदन तयार पारी मन्त्री यादवलाई हस्तान्तरण गरेको हो।

नेपाली चियाको मुख्य बजार मानिएको भारतले हालै लागू गरेको नयाँ व्यवस्था र त्यसले नेपाली चिया क्षेत्रमा पारेको गम्भीर असरलाई सम्बोधन गर्ने उद्देश्यका साथ कार्यदलले तत्कालीन, मध्यकालीन तथा दीर्घकालीन उपायहरू सिफारिस गरेको छ। प्रतिवेदन बुझ्दै मन्त्री यादवले चिया क्षेत्रको सुधार तथा निर्यातमा देखिएका नीतिगत र व्यावहारिक अवरोध हटाउन सरकार प्रतिबद्ध रहेको र कार्यदलका सुझावलाई प्राथमिकताका साथ कार्यान्वयन गरिने बताइन्।