जापानकी प्रधानमन्त्रीले भनिन् : म यति एक्लो भएँ कि साङ्लोसँगै मित्रता गाँसें

जापानकी प्रधानमन्त्री साने ताकाइचीले आफ्नो आधिकारिक निवासमा भेटिएको साङ्लोसँग जोडिएको अनौठो अनुभव सार्वजनिक गरेकी छन्।

साङ्लो हटाएपछि आफूलाई राहतसँगै केही एक्लो र दुःखी महसुस भएको उनले सामाजिक सञ्जालमार्फत बताएकी हुन्। ताकाइचीले लामो समयसम्म आधिकारिक निवासमा काम गर्ने क्रममा साङ्लो भेटिएको र त्यसलाई आफूले नमार्ने निर्णय गरेको बताइन्। बाल्यकालदेखि नै पुनर्जन्मको अवधारणामा आधारित जापानी मंगा ‘फायरबर्ड’ मन पराउने भएकाले आफूले साङ्लोलाई पनि जीवनको चक्रको एउटा हिस्सा मानेको उनको भनाइ छ।