विश्वासको मत लिन मुख्यमन्त्री थापालाई सकस, राप्रपा-नेकपाको असन्तुष्टि निर्णायक बन्दै

मकवानपुर- बागमती प्रदेशका मुख्यमन्त्री किरण थापा मगरलाई सरकार जोगाउन आवश्यक बहुमत जुटाउन चुनौती थपिएको छ । प्रदेशसभाबाट विश्वासको मत लिने पहिलो प्रयास सत्ता गठबन्धनभित्रकै विवादका कारण अघि बढ्न नसकेपछि मुख्यमन्त्री थापा दोस्रो प्रयासमा जुटेका छन् ।

मुख्यमन्त्री थापाले विश्वासको मत लिने प्रयोजनका लागि मंगलवार दिउँसो ४ बजे प्रदेशसभा बैठक बोलाइएको छ । यसअघि सोमवार नै विश्वासको मत लिने तयारी गरिएको भए पनि सत्ता साझेदार दलहरूबीच देखिएको विवादका कारण प्रदेशसभा बैठक तीन पटकसम्म स्थगित भएको थियो ।