पुस्तक चर्चा : सनत गिरीको सुख–दुःखको काव्यिक सँगालो

वि.सं. २०३० मा काठमाडौंको दहचोकमा जन्मिएका सनत गिरी गाउँले नेपाली पत्रकारिता क्षेत्रमा समेत परिचित व्यक्तित्व हुन् । लामो समयदेखि विभिन्न राष्ट्रिय दैनिक तथा रेडियोमा आबद्ध रही पत्रकारितामा क्रियाशील उनले सञ्चारकर्ममार्फत सामाजिक क्षेत्रमा पनि योगदान पु¥याउँदै आएका छन् । समसामयिक राजनीतिक, सामाजिक तथा मानवीय विषयमाथि विश्लेषणात्मक र विवेचनात्मक लेखन गर्नु उनको पत्रकारितागत विशेषता हो ।

पत्रकारितासँगै साहित्य सिर्जनामा निरन्तर सक्रिय गिरीले कथा, नाटक, गीत, गजल, कविता तथा लघुकाव्यजस्ता विविध विधामा कलम चलाएका छन् । विशेषतः गीत र कविता लेखनप्रति उनको लगाव बढी देखिन्छ । सनत गिरीका हालसम्म ‘तिम्रो लागि’, ‘सुनगाभा गीत गजल सङ्ग्रह’, र ‘परदेशी’ लघु काव्य, प्रकाशित छन् । पछिल्लोपटक प्रकाशित ‘आँसु कहिल्यै रित्तिँदैन’ उनको चौथो प्रकाशित कृति हो, जसलाई देवग्रुप प्रा.लि.का प्रमुख कार्यकारी अधिकृत नवीन सिलवालले प्रकाशनमा ल्याएका छन् ।