भोटेकोशीको बाढी : २५ अर्बको बीमा दाबी, इन्जिनियरिङमा मात्रै २० अर्ब क्षति

काठमाडौँ – भदौ १० गते भोटेकोशी र त्रिशुली नदीमा आएको विनाशकारी बाढीका कारण बीमा क्षेत्रमा अर्बौँ रुपैयाँ बराबरको प्रारम्भिक बीमा दाबी परेको छ । नेपाल बीमा प्राधिकरणले सार्वजनिक गरेको पछिल्लो विवरण अनुसार भदौ १५ गतेसम्म बीमा कम्पनीहरूमा कुल ५८३ वटा बीमा दाबी दर्ता भएका छन् । जसको कुल अनुमानित तथा प्रारम्भिक दाबी रकम २५ अर्ब ८७ करोड ३५ लाख ७९ हजार रुपैयाँ रहेको छ ।

प्राधिकरणले भदौ १५ गतेसम्म विभिन्न निर्जीवन र लघुबीमा कम्पनीबाट प्राप्त विवरणका आधारमा यो प्रारम्भिक तथ्यांक संकलन गरेको हो । बाढीका कारण क्षति भएका क्षेत्रहरूलाई बीमालेखको प्रकारका आधारमा वर्गीकरण गर्दा इन्जिनियरिङ तथा ठेकेदार जोखिम विधामा सबैभन्दा धेरै रकम दाबी भएको देखिन्छ ।