वैदेशिक रोजगारीका श्रमिकको न्यूनतम पारिश्रमिक र आउटसोर्सिङ क्षेत्रको नियमनबारे सांसदहरूको ध्यानाकर्षण

काठमाडौँ । प्रतिनिधि सभाका सांसदहरूले वैदेशिक रोजगारीमा जाने नेपाली श्रमिकहरूको न्यूनतम पारिश्रमिक निर्धारण गर्न तथा अनौपचारिक एवं आउटसोर्सिङ क्षेत्रमा प्रभावकारी अनुगमन गर्न सरकारको गम्भीर ध्यानाकर्षण गराएका छन्। मङ्गलबार सिंहदरबारमा बसेको प्रतिनिधि सभाको उद्योग तथा वाणिज्य र श्रम तथा उपभोक्ता हित समितिको बैठकमा उनीहरूले यस्तो कुरामा जोड दिएका हुन्।

बैठकमा नेपाल कम्युनिष्ट पार्टी (एमाले) का सांसद क्षितिज थेवेले वैदेशिक रोजगारीका क्रममा कुवेत जाने श्रमिकका लागि न्यूनतम पारिश्रमिकको दर सरकारी तहबाटै सुनिश्चित गरिनुपर्ने बताए। उनले घरेलु कामदारका रूपमा विदेशमा रहेका नेपालीहरूले भोगिरहेका समस्याहरूको स्थलगत अध्ययनका लागि श्रममन्त्रीले नै एक टोलीको नेतृत्व गरेर सम्बन्धित देशको भ्रमण गर्नुपर्ने सुझाव दिए। साथै, श्रमिकहरूलाई अन्तर्राष्ट्रिय स्तरको तालिम तथा सीप प्रदान गरेर मात्र वैदेशिक रोजगारीमा पठाउनुपर्ने आवश्यकता उनले औँल्याए।