राजा चार्ल्सले पहिलोपटक सार्वजनिक गरे कर विवरण, एक वर्षमा तिरे करिब २ करोड अमेरिकी डलर

बेलायतका राजा चार्ल्स तृतीयले सन् २०२४–२५ मा आफूले १ करोड २९ लाख पाउन्ड (करिब २ करोड ३५ लाख अमेरिकी डलर) कर तिरेको सार्वजनिक गरेका छन् । आधुनिक इतिहासमा आफ्नो कर विवरण सार्वजनिक गर्ने उनी पहिलो बेलायती सम्राट् बनेका छन् ।

वार्षिक शाही प्रतिवेदन तथा वित्तीय विवरणअनुसार युवराज विलियमले पनि सोही अवधिमा आयकर र पुँजीगत लाभकर गरी ७७ लाख ६० हजार पाउन्ड कर तिरेका छन् । शाही दरबारका अनुसार दुवैले स्वेच्छाले आफ्नो कर विवरण सार्वजनिक गरेका हुन् । यस कदमले राजसंस्थाको वित्तीय पारदर्शिता र जवाफदेहिता बढाउने उद्देश्य राखेको बताइएको छ ।