नीतिगत सुधारको खोजीमा सेयर बजार, केन्द्रीय बैंक र अर्थ मन्त्रायलबाट केही न केही राहत पाउने अपेक्षामा लगानीकर्ता

नेपाली पैसा

काठमाडौं : सेयर बजारको सुस्त चालले बिहीबार पनि निरन्तरता पाएको छ । नेप्से सूचक २.२७ अंकले घटेर १८८९.७३ विन्दुमा आएको छ । ७३ करोड ९६ लाख रुपैयाँको सेयर कारोबार भएको छ । १९ सयको मनोवैज्ञानिक विन्दुबाट तल झरेको नेप्सेमा यतिबेला खरिदबिक्री चाल निकै सुस्त भएको हो । सूचकमा सामान्य ह्रास आउँदा कारोबार रकम पनि थप घटेको छ । ब्याजदर घट्दा पनि नबढेको सेयर बजारले अझै थप केही नीतिगत सुधार खोजेको अनुमान गरिएको छ ।

बजार सुधार्नका लागि अब केन्द्रीय बैंक र अर्थ मन्त्रालयले केही न केही नीगित कदम चाल्नुपर्ने जानकारहरु बताउँछन् । नीतिगत सुधारबाट मात्र आम लगानीकर्ताको मनोबल उच्च हुन सक्नेछ । निकै तल झरेको बजार सुधार्न सर्वप्रथम आम लगानीकर्ताको मनोविज्ञानमा उकासिन जरुरी छ । सेयर बजार बढ्छ, यसबाट नाफा लिन सकिन्छ भन्ने मनोविज्ञान सर्वसाधारण लगानीकर्तामा विकास हुनुपर्ने जानकारहरु बताउँछन् ।

केन्द्रीय बैंकले सेयर धितो कर्जामा १२ करोडको क्याप हटाउने अनि जोखिमभार १५० प्रतिशतबाट घटाएर १०० प्रतिशतमा ल्याइदियो भने बजारले रफ्तार तय गर्न सक्नेछ । यस्तै, अर्थ मन्त्रालयले बजेटमार्फत पुँजीगत लाभकरको दर घटाइदिएमा आम लगानीकर्ताको मनोबल सकारात्मक बन्न सक्नेछ ।

धेरै लामो समयदेखि डिप्रेस बनेको बजार सुधार्नका लागि यी नीतिहरुमा सुधार हुनैपर्ने बजारका जानकारहरुको भनाई रहेको छ । अर्थ मन्त्रालय बजेटको तयारीमा जुटेको छ । यस्तै, केन्द्रीय बैंक पनि मौद्रिक नीति समीक्षाको तयारीमा छ । यस्तो बेला लामो समयदेखि प्यानिक बनेका लगानीकर्ताहरुले यस्ता आशा र अपेक्षा गर्नु स्वभाविक पनि हो ।

यता, आम लगानीकर्ताले पनि बजारको जोखिमपक्षलाई ख्याल गरी मजबुत वित्तीय सूचक भएका, लाभांश क्षमता राम्रो रहेका कम्पनीहरुमा योजनाबद्ध हिसाबले लगानी गर्नुपर्ने हुन्छ । सेयर बजारमा धैर्यताको पनि महत्वपूर्ण भूमिका हुन्छ । बजार सधैं तलमाथि गरिरहन्छ । सेयर बजारको यो चाललाई पनि लगानीकर्ताले ख्याल गर्नुपर्ने हुन्छ ।

यस दिन २६९ कम्पनीको २१ लाख ७४ हजार कित्ता सेयर कारोबार भएको छ । कारोबार रकममा ३ करोड ७६ लाख रुपैयाँसहित एभरेष्ट बैंक अग्रस्थानमा आएको छ । यसैगरी, दोस्रो र तेस्रो स्थानमा क्रमशः नबिल बैंक र शिवम् सिमेन्ट्स परेका छन् ।