अर्थमन्त्रीलाई सांसदको प्रश्न, ‘अघिल्ला सरकारले गल्ती गरे भन्दैमा तपाईंले पनि त्यही गल्ती दोहोर्‍याउन मिल्छ?’

काठमाडौँ । नेकपा एमालेका सांसद पुष्पराज कँडेलले अघिल्ला सरकारका कमजोरीलाई देखाएर अर्थमन्त्री डा. स्वर्णिम वाग्लेले आफूले गरेका त्रुटिहरूको बचाउ गर्न नमिल्ने बताएका छन्। प्रतिनिधि सभाअन्तर्गतको अर्थ समितिको बैठकमा बोल्दै उनले अर्थमन्त्रीले बारम्बार अघिल्ला सरकार र अर्थमन्त्रीहरूलाई दोषारोपण गर्ने प्रवृत्तिप्रति असन्तुष्टि व्यक्त गरेका हुन् ।

सुशासन र सुधारको एजेन्डा लिएर आएको सरकारले विगतका कमजोरी दोहोर्‍याउन नहुने उनको भनाइ छ। ‘माननीय अर्थमन्त्रीज्यूले बारम्बार अघिल्ला अर्थमन्त्रीहरूले ७३ ठाउँमा करका दर वा व्यवस्थाहरू परिवर्तन गरे, भ्रष्टाचार भयो भन्ने कुरा उठाइरहनुभएको छ,’ कँडेलले भने, ‘यदि अघिल्ला सरकारले गल्ती गरे भन्ने हो भने त्यो रेकर्डमा छँदैछ। तर नयाँ सरकार सुशासन र सुधारको एजेन्डा लिएर आएको हो भने उसले विगतका कमजोरी दोहोर्‍याउनु हुँदैन। अघिल्लाहरूले गल्ती गरेका थिए भने पनि त्यसलाई आधार बनाएर अहिले गल्ती गर्ने छुट कसैलाई हुँदैन।’