युक्रेनमा रुसी मिसाइल र ड्रोन आक्रमणमा ८ जनाको मृत्यु, थप हतियारका लागि पहल थाल्ने जेलेन्स्कीको घोषणा

एजेन्सी । रुसले युक्रेनका विभिन्न सहरहरूमा भीषण मिसाइल तथा ड्रोन आक्रमण गर्दा कम्तीमा ८ जनाको मृत्यु भएको छ भने दर्जनौँ नागरिक घाइते भएका छन्। हवाई रक्षा प्रणाली (एअर डिफेन्स) का लागि आवश्यक गोलाबारुदको चरम अभाव झेलिरहेको युक्रेनमाथि रुसले आक्रमण तीव्र पारेपछि युक्रेनी राष्ट्रपति भोलोडिमिर जेलेन्स्कीले सहयोगी राष्ट्रहरूसँग तत्काल थप हतियार उपलब्ध गराउन कूटनीतिक पहल थाल्ने घोषणा गरेका छन्।

रुसले युक्रेनको उत्तरी सहर सुमीको एक व्यस्त क्षेत्रमा दुईवटा 'ग्लाइड बम' प्रहार गर्दा ५ जनाको मृत्यु भएको छ भने ३० जना घाइते भएका छन्। बस बिसौनीमा बम खस्दा यात्रुबाहक बस पूर्ण रूपमा ध्वस्त हुनुका साथै नजिकैका आवासीय भवनहरूमा ठूलो क्षति पुगेको छ। यस्तै, दक्षिणी बन्दरगाह सहर ओडेसामा भएको मिसाइल आक्रमणमा दुई जनाको मृत्यु भएको छ भने पूर्वी सहर खार्किभमा ७ जना घाइते भएका छन्। राजधानी किभमा पनि रातभर ब्यालिस्टिक र क्रुज मिसाइलसहित ड्रोनहरूबाट आक्रमण गरिएको छ। हवाई आक्रमणको साइरन बज्नुअघि नै नागरिक पूर्वाधारहरूमा मिसाइल खसेका कारण किभमा मात्रै १२ जना घाइते भएका छन्।