संक्रमण घटे पनि टरेन डेंगुको जोखिम, रुपन्देहीमा ‘खोज र नष्ट गर’ अभियान तीव्र

रुपन्देही । विगत केही वर्षको तुलनामा रुपन्देहीमा डेंगु संक्रमण उल्लेख्य रूपमा घटेको देखिए पनि स्वास्थ्य अधिकारीहरूले जोखिम अझै कायम रहेको चेतावनी दिएका छन्। वर्षायाम सुरु भएसँगै डेंगु सार्ने एडिस जातको लामखुट्टेको प्रजनन तीव्र हुने भएकाले स्वास्थ्य कार्यालय रुपन्देहीले स्थानीय तहसँगको सहकार्यमा ‘खोज र नष्ट गर’ अभियान तीव्र बनाएको छ।

स्वास्थ्य कार्यालय रुपन्देहीका अनुसार चालु आर्थिक वर्ष २०८२–८३ मा हालसम्म जिल्लामा ३ सय १९ जनामा डेंगु संक्रमण पुष्टि भएको छ। अघिल्लो आर्थिक वर्ष २०८१–८२ मा ६ सय ३५, आर्थिक वर्ष २०८०–८१ मा एक हजार २ सय ५७ र आर्थिक वर्ष २०७९–८० मा दुई हजार २ सय ५४ जनामा संक्रमण देखिएको थियो। तथ्यांकले संक्रमण क्रमशः घट्दो अवस्थामा रहेको देखाए पनि वर्षायामका कारण जोखिम भने बढ्न सक्ने स्वास्थ्यकर्मीहरूको भनाइ छ।