रसुवाको बाढीः त्रिशूली र नारायणी नदीमा १८ शव भेटिए

तिब्बतबाट आएको बाढीसँगै चितवनका त्रिशूली र नारायणी नदीमा १८ वटा शव भेटिएको छ । कुरिनटारदेखि नारायणगढको लिला चोकसम्म ती शव भेटिएका हुन् । प्रमुख जिल्ला अधिकारी गणेश अर्यालका अनुसार साँझ ६:०० बजेसम्म ठाउँ-ठाउँमा ती शव भेटिएका हुन् ।

सुरक्षा निकायले नदी तटीय क्षेत्रमा उच्च सतर्कताका साथ बगेर आएका शव निकाल्ने काम गरिरहेको छ । उहाँले भन्नुभयो, “अहिलेसम्म १८ वटा शव भेटिएको छ । १२ वटा हातखुट्टा भेटिएका छन् । अरु विवरण लिँदै छौँ ।” बाढीको बहावसँगै ती शव आएको उहाँले बताउनुभयो । बाढी नारायणगढसम्म आइपुग्दै गर्दा पानीको बहाव खतरा तहमा पुगेको छैन ।