बाँदर आतंकबाट हैरान धनकुटाका किसान वैकल्पिक खेतीतर्फ

२८ असार, धनकुटा । बाँदर आतंकबाट हैरान भएपछि धनकुटा महालक्ष्मी नगरपालिका–५, मिलाङचुङका किसान वैकल्पिक खेतीमा लागेका छन् । धान, मकै, टमाटर, प्याज र मौसमी तरकारी लहलाउने खेतबारीमा अहिले बेसार, अदुवा, भुइँकटहर र अकबरे खुर्सानीको खेती हुन थालेको छ ।

तीन वर्षअघिसम्म किसान चमकबहादुर कुँवरको दैनिकी आम किसानकै जस्तो थियो– मौसमअनुसार बाली लगाउने, मलजल गर्ने र राम्रो उत्पादनको आशा गर्ने । तर बाली पाक्न नपाउँदै बाँदरका हुलले खेतमा पसेर महिनौँको मिहिनेत केही घण्टामै सखाप पारिदिन्थे । रातदिन खेत कुर्दा पनि उत्पादन जोगाउन सकिँदैनथ्यो । बारम्बारको क्षतिपछि उनले खेतीको ढाँचा नै परिवर्तन गर्ने निर्णय गरे । र, अहिले करिब १० रोपनी क्षेत्रफलमा व्यावसायिक बेसार खेती गरिरहेका छन् ।